Flugzeich als Glicksbringer

Do war de Vetter Stefan aus Bentschek mol vor Johre in Bad Felix uf Tratament. Er hat so e Kart ghat vum Sindikat, is dorte in Felix schlecht un recht inquatiert gin, hat sei Behandlung vorghol un aach e Platz in der Kantin reserviert ghat. Un wie des schun vorkumme sellt, wann e Mann leenich ins Bad fahre tut, hats sich grad so gemacht, dass de Vetter Stefan aach e hibschi Dame an seim Tisch hucke ghat hat.

Am erschte Tach is unser Vetter nit fertich gin, des Weib zu betrachte. Er hat feschtgstellt, dass es zwaa allerliebschti Griebchen in die Backe kriet hat, wanns gelacht hat, dass es beim Rede nit grad die Gscheitheit mitm Suppeleffl gfress hat, awer aach, dass sei Tischdame e goldni Kett am Hals bamble hat ghat. Un an dere Kett war e Rindsknoche un e Flugzeich als Glicksbringer angebrung.

An eem scheene Tach leffle die zwaa heißhungrich ihre Supp, de Vetter Stefan werft ab un zu e Blick uf des Weib, des wu ufmol ufheert zu leffle un de Vetter Stefan froot:

"Gelt Vetter, eich gfallt des Flugzeich do aarich gut?"

"Jo, sicher. Doch noch vill besser gfallt mer der Flugplatz!"

Owacht gin!

Vun dem Bad Felix hat mer aach uf Ausflug fahre kenne. So hat de Vetter Stefan sich mol zammgephackt un is uf Stana de Vale, for e bissl frischi Luft schnappe. Es war grad an eem Freitach, wu alli Baure von dorte in Großwardein inkaafe ware. De Bus war gstuppte voll, nit nor mit Leit, sundern mit Kerb, Taschne un Rucksäck. Wer ke Sitzplatz ghat hat, wie unser Vetter, der hat misse uf eem Fuß stehn.

Sie sin schun seider eener Stund gfahr un ware noch immer nit ankumm. De Vetter Stefan war vun dem Bad am Vormittach hundsmied. Newer ihm war so e Mann gstann mit eem Rucksack newer sich. Heeflich froot de Vetter Stefan, ob er sich do uf de Rucksack sitze kann. Druf ment der Mann:

"Jo, awer ihr misst owacht gin , es kennt was vorkumme!"

"Hat der dann Aijer in dem Rucksack?"

"Wuher dann, do drin is Stachldroht!"

Ufgschnappt vun ha