De bekannte un beliebte Banater Mundartautor Ludwig Schwarz tät heier in phaar Täch 95 Johr alt gin. Er is am 22. August 1925 in Dolatz uf die Welt kumm un am 3. Juli 1981 in Bukarest gstorb. Noh em Schulabschluß in Fatschet un Temeschwar is er in Berlin zum Baufachmann ausgebild wore. Er war an der West- un Ostfront stationiert un is in russiscchi Kriegsgfangenschaft gerot, vun dort weger Arweitsunfähichkeit 1945 entloss, is er zruck ins Banat kumm un hat sich in Neipetsch niedergeloss. Vun dort is er in de Baragan verschleppt gin. 1956 wieder zruck uf Neipetsch kumm, war er als Bauarweiter, Baumeischter un Baustelleleiter tätich. Er hat Bekanntschaft mit Nikolaus Berwanger gschloss un 1970 sei Beruf gewechselt. Er war Redakteur der „Karpatenrundschau“ un später der „Neuen Banater Zeitung“. Nit zu vergesse, er war derbei, als im Johr 1969 die „Pipatsch“ ins Lewe geruft gin is, bei dere er langi Zeit mitgearweit hat!

Schun 1945 hat Ludwig Schwarz angfang Gedichter zu schreiwe. Später ach Reportagen un Erzählunge. Sie sin zammgfasst gin un im Band „Das Schlüsselbrett“ un später „Man bringt nicht viel mit aus Cherbourg“ publiziert wore. Ach Mundart hat er gschrieb. „Mer macht sich halt Sorche“ (1968), es Lustspiel „Die Husarenkammer“, e Bauerndrama „Matthias Thill“. In seine letschte Lewesjohre hat Ludwig Schwarz sich mit der bekannti Tetralogie „De Kaule-Baschtl, A Lewesroman“ beschäfticht. (ha)

Die Lieb

Mir han des net erfun,
daß jungi Leit sich gere han,
un niemand hats noch abgebrung,
un niemand des aach kann.

Des bleibt, so lang die Welt do steht,
die Lieb in dere Welt.
Un wann aach alles mol vergeht,
sie is mehr wert wies Geld.

Was gibts net alles do,
was uns es Lewe laadich macht?
Un trotzdem is, was ewich lacht,
un ewich bleibt des so:

Die Lieb, so lang die Welt do steht.
De Teifl hol des Geld!
Un wann aach alles mol vergeht,
die Lieb bleibt in der Welt.
Ludwig Schwarz